مونتريال


وأخيرا هاهو الموضوع المنتظر .ـ
بصراحة لم أكن أتوقع أن ثلاث تقارير مختبر مع واجب تلخيص مع امتحان

10 %

من فصل المفروض ندرسه بنفسنا مما يعني إني لم أتعب نفسي حتى بقراءة فهرس الفصل إلى ماقبل الإمتحان بيومين … ماكنت متوقع ان هذه الشغلات البسيطة ستجعل الإسبوع الماضي أصعب إسبوع لهذه السنة بكل جدارة واستحقاق !ـ
————————————–

البعض يستهين بالإعلان ويرى ان ليس له أثر كبير في توجيه الناس وتغيير آرائهم حول منتج أو بضاعة أو حتى مرشح فاسد. كذلك في بعض آخر يعتقد ان الإعلان أمر هين وبسيط ولا يحتاج سوى إلى خطاط أو رسام أو حتى في بعض الحالات مجرد كاتب يكتب على خرجة ولا على وسيلة كلمتين عن المنتج ( أو المرشح ) المطلوب ترويجه وينتهي الأمر ، لكن الحقيقة امر آخر. الإعلان فن كبير وبحر عميق ومو أي واحد يقدر يتقنه . الإعلان علم يدرس في الجامعات والمعاهد .. يعني قبل لا تبدى تصميم أي إعلان لازم تحط هدفك من الإعلان وثم تشوف الشريحة المستهدفة بالإعلان علشان تدرس ميول هذي الشريحة و طبقا لهذي الميول تصمم الإعلان بشكل يجعل الشريحة المستهدفة لا شعوريا تقتنع بالإعلان كونه أشبع جانب من هذي الميول .ـ

.

.

طبعا مجرد التقلسف لا يكفي لبرهنة فكرة ما ، وعلشان جذي قلت لازم يكون في مثال حي يخليكم تقتنعون بقوة الإعلان وأهميته . الصيف الماضي نفس هالفترة قررت عائلتنا الكريمة قضاء شهر إجازة في ربوع امريكا الشمالية ، وكوني في كندا فكان المفروض إني أساهم في وضع خطة السفر وحجز الفنادق وغيرها من الأمور . اقترحت على الأهل ان تكون اول ثلاث ايام من رحلتهم في مونتريال كونها أول محطة في شرق القارة ، بمعنى إنها أقرب مدينة تسوى للي مسافر من الكويت أو الشرق بشكل عام . وقت هالحجي ما كنت طالب بمونتريال ولا كنت أدري ان الايام راح تدور وراح أحول مونتريال. كنت وقتها في مدينة فانكوفر في أقصى غرب القارة ، أي على بعد اربع ساعات طيران مما يعني إني علشان احجز فندق فلازم استخدم النت .ـ

.

.

طبعا رحلة لمدة شهر محتاجة ميزانية جايدة فالوالد حطلي ميزانية محدودة للفنادق ،أول شي ابوي حصل شقق فندقية ممتازة وسعرها حلو وارسل لي ايميل لكن تأخرت على ماتصلت عليهم فقالي راحت عليك كل الغرف انحجزت حق المشاركين ببطولة السباحة ، وقتهم هذيل بعد !ـ زعل الوالد فقلت له ولا يهمك احصل لك الي احسن منه .. واحوس احوس ليمن لقيت فندق شكله عجيب : الصور اوكي والموقع بنص الداون تاون و مصنف في اكثر من موقع ضمن الثلاث نجوم .. واهم شي ان سعره شوي اغلى من الي الوالد لقاه بس شجاب لجاب .. موقع الفندق الي لقيته يغري أكثر .. تدرون أي فندق لقيت ؟؟ـ

لقيت هذا : ـ

http://www.hotel-saint-malo.com/

أنا أكثر شي عجبني هو صور الثريات الانتيكة ..قلت هذا أكيد المطبخ الي يصير بالغرفة الكبيرة .. قلت إذا هذا مطبخهم عيل الشقة شلون صايرة … مهية ..هذا المفروض 5 نجوم مو بس ثلاث !!ـ

طبعا بالتمهيد الي تحت هالموضوع مجموعة لا باس فيها من البلوقرجية قالوا انه خوش فندق ويسوى وشكله حلو .. إذن قرارنا إن أول ثلاث ايام نقضيها بهالفندق كان صائب ..جيد

.

.

وجاء اليوم الموعود .. كان المفروض ان الاهل يوصلون من الكويت 12 الظهر وانا اوصل بعدهم الساعة 12 بالليل لان ماكان في حجوزات نفس الناس. وفعلا رحت المطار و كالعادة لازم تأخير .. تأخيري كان بس ساعة ..يعني وصولي راح يصير 1 ليلا مو 12 .. لكن ما تصلت عالاهل ولا قلتلهم .. لما قال الكابتن استعدوا لهبوط الطائرة سرحت بخيالي بعيييييد .. قلت ايييه الحين اول ما اوصل ذاك الفندق العجيب بو ثلاث نجوم .. بيجي عامل الفندق بالعربانة بياخذ شغلي لي داخل … بعدين راح أدخل ذاك اللوبي الواسع الي أرضيته رخام ابيض والثريات ترس السقف .. شي شي

وبعدين بروح حق الريسبشين ..مرة وريال لابسين رسمي .. بقولهم أنا عندي حجز باسمي واهلي موجودين ..ممكن رقم الغرفة وتلفونها ..وبعدين بروح حق تلفون اللوبي الي يكون صاد شوي ورا الاصنصيرات وبدق عليهم وبقول سامحوني صار تاخير برحلتي وراح اتاخر عليكم فناموا لحد ينطر … وعقبها على طول اصعد واسويلهم مفااااااجأة

.

والله ان خيالي كان وااااااااااااااااايد واسع ماشاء الله علي :)ـ

.

.

الي حصل عقب ما هبطت الطائرة التالي : اروح للتاكسي اقوله خذني الفندق الفلاني .. ماعطيته العنوان لانه حدي واثق انه فندق مشهور وكل التكاسي يعرفونه … وقف الريال خمس دقايق يفكر جان يقول ايييييييييييييي ذكرته ذكرته مار علي هالفندق . قلت بسري صج انك شايب وماتفهم ..في احد ما يعرف هالفندق ؟! ثلث ساعة على ماوصلنا الداون تاون .. الامور لحد الحين مريحة الشوارع زينة .. شوي قام يخورها راعي التاكسي الله يهديه .. قام يدش بدواعيس تيب اليهد ..عماير تعبانة شوارع ضيجة سكارى يصارخون .. قلت بسري لا أكيد هذا طريج مختصر ماشاء الله عليه هالتاكسي طلع فاهم … بلطريج مرينا على عمارة عودة وقديمة قلت يا الله مو هذا فندقنا .. اللفة الي على طول بعد العمارة وقف ابو الشباب وقالي تفضل .. لااااااا ليكون هذا هو الفندق .. نزل جناطي وانا اطالع ذيك العمارة بتحسر قلت له وين الفندق …قالي هذا الفندق وصبعه ياشر على عمارة ثانية ..تدرون كان ياشر على شنو ؟؟ـ

لما شفت الفندق قلت ياليييييت ذيك العمارة كانت فندقنا !! طالعت الغرف قلت ياعمي أي مفاجاة أي بطيخ ..شكلهم من القهر قاعد يتطمشون من الدرايش منو الي رايح ومنو الي ياي !! وعقب ماصحيت من الصدمة قررت إني أستجمع قواي وأدخل .. ابي افتح الباب ولا مسكر ..لاحظت دقمة المفروض انها جرس .. اضغط واضغط واضغط ..عقب خمس دقايق يطلع لي صوت وحدة بتنفجر من النوم .. شتبييييييييييي !! أنا زبون عندكم وعندي حجز بالفندق … طقت الانتركوم وقالت دش .. بدخل جناطي ولا ممر ضيييج ومافي اي اثر لاصنصير .. قلت يعني ما في اصنصير زين تحس على دمها وتشيل الجناط يعني مهما كان انا داش فندق !!ـ

.

.

دشيت الرسيبشن ولا خرمس ماكو غير هالي مستعسرة علينا .. انت شتبي خرعتنا تالي الليل !! لا بس اهلي موجودين عندكم هني .. قالت اي هذيله اهلك ..روح تلقاهم بالطابق الثاني ..وشلون عالجناط ؟؟ اي شيلهم وكاهو الدري .. ييت بسالها إذا تعطيني مفتاح مغناطيسي لكن قلت عن قصة الويه !! صعدت والله خوش دري .. صك على اصنصير احلامي :)ـ

الطابق الثاني مافيه الا بابين .. طقيت واحد منهم ولا يطلع لي ابوي .. عقب السلام والكلام اطالع والا الحالة كسيييفة عندهم .. يقولك غرفة سواق مو فندق !!ـ

قالي لا ابشرك ..هذي أصلا أكبر غرفة بالفندق !! روح تطمش على الغرفة الي بتنام فيها مع إخوانك بعد شوي :)ـ

رحت ولا أشوف المأساة :ـ

بتقولون نفس الويب سايت صح ..شوفوا تكملة الغرفة :ـ

أما الطامة الكبرى فلما قررت اخذ شاور عقب السفرة المتعبة :)ـ

هو في الحقيقة الفندق مقبول لو كنت مسافر مع ربعي ونبي نوفر .. لكن صعبة حييل تاخذ فندق بوربع نجمة مثل هذا مع عايلة .. لا وكأول فندق برحلة الشهر .. يعني الجماعة أصلا قبل لا يسافرون بشهر يتحلمون بديرة الاحلام علشان ينصدمون بهالفندق العجيب :)ـ

على الاقل لو صور الفنق الخارجية كانت محطوطة بالويب سايت جان تقبلنا الوضع ..لكن الحبيب مصورلي احلى عمارات المدينة وبعدين الغرف الداخلية للفنقد فهذا يسمونه نصب واحتيال .. لكن إذا عرف السبب بطل العجب !!ـ

يقول الوالد أول ماوصلنا الفندق حسيت دمي يفور ..قلت مستحيييل أسكن هني …شوي ومع تعب الرحلة قلت بجيك إذا أسرتهم نظيفة ننام الليلة وباجر يصير خير . دخل الفندق ولا الي عالرسيبشن واحد سحنته مصري .. يقول على طول وقبل لا يتكلم بكلمة صدته : السلااام عليكم !! أبو الشباب وجهه قلب الوان .. يكون متنكر مايبي أحد يعرف انه عربي لكن هيهات :) قاله الوالد عندنا حجز ونبيك تضبطنا بالغرف الزينة .. قاله ايوه حاضر يا بيه ، حديك أكبر غرفة بالفندق مع غرفة كبيرة ثانية .. ويصعد بفخر ويوريه الغرفتين الي حطيت صورهم فوق … أبوي طالع الشراشف مقبولة نوعا ما للنوم ولو مؤقتا بس قال شغلة حازة بنفسه : مو جنه الغرف صغيرة شوي ؟! رد عليه ماهر المصري : عفوا انته تتكلم عن الصغيرة ولا الكبيرة !! أبوي شافه للحين مقتنع انه عنده غرفة كبيرة فآثر يغير الموضوع .ـ

.

طيب يا ماهر القبلة فين عاوزين نصلي .. يقولك اشر على الاتجاهات الاصلية الاربع كلها زائد كل الاتجاهات الفرعية .. الظاهر مؤمن ان اين ما تولوا فثم وجه الله :) … يبه يمكن ماهر صاحبك مسيحي …لا لا ما اظن مسيحي اسمه ماهر .ـ

.

مسكين ابوي مادرى الا قبل لا نطلع من الفندق انه ابو الشباب اسمه ماهر حنا … ويبي يصلي على جبلته بعد :)ـ

بص صج صج أكثر شي ونسنا بهالرحلة هالتحفة ماهر .. يعني لقينا شي ننكت عليه لمدة شهر كامل .. المفروض يحطونه بالويب سايت مالهم :)ـ

يقولك ثاني يوم الصبح على ذمة اخواني الصغار كان ماهر عايش الدور انه فندقه ثلاث نجوم فمسوي ريوق انتركونتينتال يا الله من فضلك .. درزنين دونتس و قهوة فورية .. وينزلونلك عايلة انجليز لفوا الاكو والماكو ماخلوا الا قطعة دونتس وحدة .. ثاني يوم ولا الريوق هو القطعة الي بقت من امس .. أله .. هو هنعمل لوكم فطور كل يوم ولا ايه !!ـ

الحمدلله ان ماكنا بعازته ..الوالدة مابقا معجنات ما بقى ورق عنب ما بقى سندويشات مايبتها من الديرة .. تقول حاسه فيني محروم سنة كاملة .. يقولك بسطنا بالغرفة الكبييييييييرة ناس فوق الفرش وناس تحت وتريقنا .. ولا منة ماهر بيك !!ـ

.

العصر بعد ماردينا من الفرارة الوالد بغا شاي … امي تتصل علي من الغرفة الثانية تقول انزل مع اختك الصغيرة وعبوا القوري ماي حار من غلاية ماهر الي تحت .. يمه اكيد عندج بمطبخ الغرفة كل ادوات الطبخ الاساسية من غلاية وجدور وغيره .. انتي بفندق راقي ترى … الطموح عن الطنازة وانزل بسرعة فكنا :)ـ

.

ننزل ولا البيك عشتوا يكلمني انجليزي .. اموت على الاتيكيت ولو انه مايلوق .. بغيت ماي حار .. على طول شغل الغلاية الي يمه عالطاولة .. ايي بعد بغينا شكر وكريم مبيض .. شوف الداعوس الي على يمينك فيه ثلاجة .. افتح وتحصل الي تبيه .. والله دشيت الداعوس ولا غرفة نوم الي يشتغلون بالفندق .. غرف السواق احلى منها .. ولا تعليق طبعا عالثلاجة الي فتحتها !!ـ

.

ابوي لمه وصل كان مقتنع انه فندق مثل الاوادم فحط جوزاته عند ماهر بالامانات …. قاله بكره من صباح الله خير بنسافر بمحطة القطار فباخذ منك الجوازات والفاتورة .. نقعد الصبح والتاكسي واصل وكل شي تمام .. بس الرسيبشن صخخخه مافي اثر لاحد .. و هذي صورته :ـ

ما تلاحظون شي غريب هالصورة ؟؟ مو جنه الثريات الانتيكة الي اغرتني اختار الفندق على اساس انها ثريات مطبخ الغرف وانه الطاولة الي بالصورة هي طاولة المطبخ .. طلع هذا الريسبشن مالهم !!ـ

وندق باب الغرفة ندق الجرس خلاص قطارنا بيمشي لكن لا حياة لمن تنادي .. بعد يمكن نص ساعة صحى واحد منهم عين مفتحة عين مغمضة عطانا جوازاتنا وعلى طوووول قبة … امحق فندق بس !!ـ

.

الطريف هو انه بعد شهر لما حولت مونتريال ابتلشت بمجموعة زوار مو حاجزين فندق ومتوهقين .. كل فنادق المدينة مفولة فقلت ماكو الا هالفندق الفاشل مستحيل يفول .. اروح ولا ماهر بويهي ..ماهر افندي عندك غرف .. لا والله مفوول الفندق وهو متشقق يقولها … مايلووووووووق فندق مثل هذا يفول بس سبحان الله ارزاااق ..طلعت ذاك اليوم وانا اضحك ..بس مارديت له مرة ثانية وما اتمنى اضطر ارد .ـ

.

.

الشاهد من هالتجربة الي سردتها عليكم هو انه ليس كل مايلمع ذهبا ..الي بيسافر السنة خل يتأكد مليون بالمية قبل لا يحجز اي فندق سواء عالنت او من المكاتب السياحية .. ترى ماتسوى عليكم تخترب الرحلة علشان فندق فاشل دعايته مغرية نوعا ما .. وهالشي ينسحب على بقية المنتجات والبضايع الثانية حتى لو كانت البضاعة مرشحين !! يعني مو باجر وحدة منتخبة مرشح علشان والله شكله وسيم ولا اعلانه يهبل .. خو مشكلة الي توه معطينهم حقوقهم مايعرفون :)ـ

————————————————–

واخيرا عطونا رايكم بتنسيق الموضوع ..شنو تفضلون توسيط النص ولا النص يكون عاليمين ؟!ـ

وهل الفقرات المتصلة اسهل بالقراءة ام ان كل جملة في سطر مثل بوستاتي السابقة ؟؟ـ

وهل العامية ام الفصحى الي بديت فيها كتابة البوست بعدين مسحتها لاني حسيت دمي ثقيل نوعا ما :)ـ

وآسفين حييل عالطوالة …ـ

السلام عليكم ورحمة الله وبركاته

.

.

اسبوعين مرت على اخر بوست لي في هذه المدونة الي صارت جزء لا يتجزأ من حياتي !!ـ

طبعا الشكر موجه لكل من سأل عنا وكل من فقدنا وكل من دعا لنا بظهر الغيب لان حدي محتاج لدعواتكم الطيبة

.

.

الحمدلله نتائج السنة الدراسية الماضية كانت نصر مبين وفتح كبير و الله اكبر فوق كيد المعتدي ” بروف سوامي !!”ـ

سبحان الله قبل سنة كان اكبر هم هو اني اعدي من غير لا يحوشني انذار

والحين الهم هو كيف احصل على مكافأة التفوق — > واحد يبي لاب توب بس مقحط :)ـ

.

.

بعد ظهور نتايج الفصل الدراسي المنصرم .. اندلعت شرارة الثورة المجيدة

” للاسف ربعنا هني ماحطو لون لثورتهم “

على كل البروفيسورات الفاسدين الذين يتآمرون ليل نهار لتسقيط الطلبة والطالبات ظلما وتجنيا دون وجه حق

هذا على الرغم من اني ما انظلمت ولا تضررت ولا اشوف ان الامتحانات كانت فوق المستوى المتوسط .. لكن لاني اثرت السلامة و ماحبيت اني اصير محسوب على فئة المفسدون في الارض اضطريت اني اركب موجة الثوار واثور على كل الظلام ابتداء بسوامي الي عطه نص الصف امتياز والنص الثاني سقوط فكان مصيره القلع والطرد من الجامعة الى غير رجعة .. يبدو ان السالفة فيها ان ..شكله واحد من ربعنا سيد واحنا ماندري !!ـ

.

.

شعار اما معنا او ضدنا اعتقد انه ظالم نوعا ما لكن هو المنتشر هاليومين في كل مكان وفي كل ثورة

ياترى كم واحد اضطر ان يكون في مثل موقفي في مختلف الثورات على وجه المعمورة !!ـ

.

.

على طاري الثورات ، ذاك اليوم كنت قاعد اقرا عن تاريخ جامعتنا فاخترعت

اكثر جامعة في كندا ويمكن حتى بامريكا مهتمة بالسياسة هي جامعتنا ولا فخر

الي لاحظته خلال التسع الشهور الماضية ، وهي الفترة التي قضيتها هنا ، هي ان في طابق الميزانين من المبنى الرئيسي لازم لاااازم اذا الفلسطينيين حطوا طاولة يشرحون فيها قضيتهم تلقى يمهم على طول طاولة للاسرائليين

واذا الاسرائليين اقاموا مؤتمر عن بلدهم وبدوا يوزعون البروشورات عن مؤتمرهم تلقى العرب على طول مؤتمر مضاد وفارشين الميزانين قبور وكاتبين فوقها ” صنع في اسرائيل ” !!ـ

اذا العرب سوو مظاهرة بالشارع الاسرائليين على طول مظاهرة مضادة وتشابك بالايدي

الي يسمع يقول بجامعة تل ابيب مو كونكورديا !!ـ

كذلك في انتخابات الاتحاد الأخيرة .. شفت اهتمام مو طبيعي بالانتخابات نفس الوضع بجامعة الكويت

ماشفت هالشي كلش بجامعتي القديمة حيث اغلب الطلبة صينيين هناك مالهم شغل الا بالفلوس والدراسة!!ـ

المسلمين بتحريض اخونجي ” مو كويتيين بس رابين بالكويت !!”ـ تحالفوا مع احد الاحزاب المحافظة ضد حزب تحالف الليبراليين واليهود

وتصير الصكة بالحملات

الليبرالين من حقارتهم قاموا يتمشون مفصخين بالجامعة عناد بربعنا

والمفاجأة ان بتواطء منهم مع ادارة الجامعة خلوا ربعهم يسوون قائمتين جدد باسماء مشابهة تماما لاسم قائمة ربعنا لكن مع زيادة كلمة وحدة فقط لتضليل الطلبة

وفعلا عقب يوم من بداية الانتخابات ” الانتخابات تستمر ثلاث ايام “ـ

تم ازالة قائمة وحدة من القائمتين الوهميتين الي هدفهم كان سحب الاصوات

لكن الاصوات الي خذتها هالقائمة انلغت وراحت على ربعنا

يعني اشكره مؤامرة والدليل ان القائمة الثانية الي مالغوها حصلت 100 صوت بس ورئيسها شارك باحتفالات النصر للقائمة الليبرالية ” يعني نصب عيني عينك “!!ـ

نجحوا بفرق 600 صووت مع ان ربعنا فازوا قبل شهر بانتخابات كلية الآداب والعلوم وهي اكبر كلية على الاطلاق بالجامعة

وكلية الهندسة طبعا محسومة لنا لان الغالبية الساحقة فيها مسلمين

انا كنت ضد اقحام الدين بالانتخابات وضد نظرية المؤامرة لكن عقب الي شفته بعيني اقتنعت بأن المؤامرة موجودة على اصولها .. هذوله يهوووود مو اي ناس !!ـ

.

.

المشكلة اني لما قريت التاريخ عرفت ان الي شفته ولا شييييي

يقولك في الستينات الطلبة حسوا ان الجامعة كانت عنصرية بتعاملها مع احد الاساتذة فعصبوا واحتلوا الطابق التاسع الي فيه لابات الكمبيوتر

سووها ثورة جد لمدة اسبوعين والجامعة ساكتة عنهم ومانادت الشرطة

لكن لما مصخوها يابت الجامعة القوات الخاصة فكردة فعل الطلبة حذفوا الكمبيوترات من درايش الدور التاسع وحرقوا الطابق بكبره مما ادى الى خسائر تقدر بمليونين دولار !!ـ

من الطرائف ان من ضمن المشاركين بالثورة المذكورة ناس صارت واصلة فيما بعد مثل رئيس وزراء دولة الدومينكان !!ـ

يعني هم غريب وهم ثاير .. انت شكوو … وشكوو واحد مخرب مثلك يصير رئيس مجلس وزراء !!ـ

ذكرني بالي حاولوا يفجرون موكب الأمير عندنا !!ـ

.

كذلك ضمن التاريخ الدامي انه في التسعينات وفي نفس الطابق قام احد الدكاترة الي من اصل روسي بقتل اربعة من زملائه احتجاجا على تآمرهم ضده في اربع مناسبات كان فيها على وشك الحصول على عقد عمل في الجامعة مدى الحياة لكنهم كانوا عقبة بطريجه !!ـ

انا هني خفت حدي .. ربعنا طلعوا ما يغشمرون .. باجر لو سوامي يطيح على مدونتي انا على طول بروح من جيس اهلي !!ـ

المشكلة ان وايد اكون بهالطابق المشؤم .. ماكنت متخيل اني قاعد اتمشى في مسرح ثورات وجرايم خطيرة جذي !!ـ

.

.

اخر ثورة شهدتها جامعتنا كانت سنة 2002 لما نتينياهو كان المفروض يلقي كلمة بالجامعة بدعوة من الطلبة اليهود

يقولك صارت افلام هندية .. اعتصامات ومظاهرات لايام متتالية قبل لا يوصل

هذا غير احتلال المبنى من قبل ربعنا ومنع اي واحد من الدخول مما ادى الى تاجيل المؤتمر مع اجرائات مشددة اكثر

وفعلا طلبت الجامعة القوات الخاصة وصارت الاجرائات مشددة اكثر لكن ربعنا كان نصهم داخل المبنى ونصهم برا ” ما كانوا يدرون بالموعد الجديد ” ـ

لكن لما دروا بدا الطق وبدا التخريب

ولما مصخوها قاموا يكسرون الزجاج الرئيسي الي بالطابق الارضي ” عندنا مافي طوفة لا يعني كشخة حاطين زجاج ” ـ

فالي برا قاموا يدخلون ليما تعقد الوضع فرشت الشرطة الغبية الغاز المسيل للدموع الي تسرب الى اجهزة التكييف مما ادى الى اخلاء المبنى وبالتالي الغاء المؤتمر

يعني بالنهاية صج كذا طالب انفصل وتحاكم ولكن ثورتنا انتصررررت مو مثل بعض الثورات :)ـ

.

.

شكلي نضلت روحي

كل ما اشوف واحد كنت اقوله اني باخذ هالصيف كورس واحد بس لانه مافي مواد

فالبتالي فاضي وماعندي شي

اول صدمة كانت ان المادة الي ماخذها دسمممة بمعنى الكلمة

تعتمد على مواد درستها بالماضي السححييييق ووين اتذكرها

والدكتور يكتب بسرعة البرق ويتكلم اسرع بشوي

يعني انسى تلحق معاه

.

.

والصدمة الثانية هي اكتشافي المتأخر جدا الى ان ميولي هي سوفتوير وليست هاردوير

ذاك اليوم عقب مانبهني واحد من الشباب الي يدرسون ماجستير الى اهمية مهندس السوفتوير والى ان الطلب عليه زايد بسوق العمل عندنا

قلت لازم ابحث بالموضوع

عكفت جدام الكمبيوتر يومين اقرا بالمقالات والمواقع من الصبح الى الليل الى ان اقتنعت كليا الى اني سوفتوير ولا شيء سوى السوفتوير

مايعني اني لازم اغير جدول موادي للسنة القادمة

التغيير كان جدا عسر لقلة المواد المعروضة وتضاربها

وماقدرت ارقع اي جدول الا اذا اخذت مادة ثانية هالصيف

سجلتها في اخر يوم للسحب والاضافة وكان احد اي عطلة

وثاني يوم على طول لاب وانا مادري المادة عن شنو اصلا ولا ادري وين الاب

دزيت ايميل للبروف عطاني سيفووون

داومت الصبح الساعة تسع عند باب المكتبة اول مافتحت شريت دليل الاب

بعدين رحت سالت عن مكانه

بقى عندي ساعة الا ربع اقرا عن التجربة الي المفروض الحين اسويها

صدددددمة .. التجربة عن موضوع ما اواطنه بعيشة الله ومعقدني صارله سنين

ثيرمو دايناميك والعياذ بالله

شلون بفهمه بنص ساعة تحبطت على الآخر

لكن الله سهلها

طلعت اسخف تجربة بالتاريخ .. كل شي موصل وجاهز وكل الي علي هو اني اشغل مولد الكهربا واقيس تغير درجة الحرارة كل دقيقة لمدة ساعة ونص

يخرب بيت السخافة !!ـ

.

.

في كلام وايد بعد ودي اقوله لكني بصراحة مابي اطول عليكم زيادة

ولاني ايضا تعبااان

هاليومين شوية متكدر

رديت من المحاضرات قلت احسن حل هو اني امسك اوراقي واكتب كل همومي

فعلا كنت صريح مع نفسي وكتبت كل شي بخاطري

حسيت اني فرغت وارتحت

فالخطوة التالية كانت وضع الحلول على المدى القصير والطويل لهذي الهموم

على المدى القصير قلت احط جدول لتخليص العاجل من الامور

صار الجدول على شكل عمل متواصل الى تاريخ 12/6 .. هذا بس العاجل من الامور !!ـ

صج بعد ماضفت هالمادة صرت مشغول عالآخرررررر

ضغط مو طبيعي مادتين دسميين بشهرين

يعني الحين المفروض ان خلصنا نص المنهج وللحين ماندري شالطبخة

لكن انا واحد استخرت وارتاح قلبي للهطريج فلابد ثم لابد اني امشي عليه وربي بيساعدني

.

لانها ثورة حتى التخرج !!ـ

.

و اسمي بيكون ضمن هاللستة في المستقبل يإذن الله !!ـ

.

.

.

.

.

.

.

.

حكمة اهديها للجميع

.

إذا المرء لا يرعاك إلا تكلفا ** فدعه ولا تكثر عليه التأسفا

ففي الناس أبدال وفي الترك راحة ** وفي القلب صبر للحبيب وإن جفا

.

إذا لم يكن صفو الوداد طبيعة ** فلا خير في ود يجيء تكلفا

ولا خير في خل يخون خليله ** ويلقاه من بعد المودة بالجفا

واخيراااا في مزاج اكتب بوست .. يس !!ـ

اهي مواضييع اهي هذرة اهي خرابيط براسي

لكن حسبي الله على الامتحانات ..

.

.

اول امتحان كان امتحان العم سوامي اطال الله في عمره ليكون علة على جبود الاجيال القادمة :)ـ

صج صج هالريال كسر خاطري

لي قعدنا ندرس للفاينل كل خمس دقايق لازم فاصل دعاء

” اللهم عليك بسوامي “

” اللهم ان اراد بنا ضرا فشل يده واوقف قلبه وزلزل اركانه “

” اللهم عليك به .. اللهم فاجعل كيده في نحره .. واجعل تدميره في تدبيره “

” اللهم فاخذه اخذ عزيز مقتدر “

انا الي اهو انا الي هجيته وكتبت فيه شعر كسر خاطري

عاد مو لي هالدرجة شقيتوه المسكين شق !!ـ

اقترح على العفاسي شريطه الجديد يكون ” أدعية سوامي “ـ

.

.

قبل الامتحان بخمس ايام

حضرة جنابي اتسوق بالجمعية

التلفون يرن

نعم

الطموح وينك

بالجمعية اتسوق شعندك ؟؟ـ

شنو شعندك .. انا حدي خااايف ومتوتر وانت تتسوق صج ماكو ذوق

حبيبي شالسالفة

اليووووووم بالكلية تدري من شفففففففت

منووو

شفت عمك سوامي وعمك عمير الي درسنا الدوائر الكهربية

اييي عمير يحليله .. كنا نقول معقد ونحيس على انبو رئيس القسم مادرينا انه رفيق دربه سوامي العن بمراحححل

اي كانوا يمشون كل واحد ايده بايد الثاني وانا اخزززززهم

وبعدين

عمير تبوسم وسلم علي

حلو وبعدين

ابي سوامي يحس على دمه ويسلم .. ماكو .. بالاخير تبسمت بويه جان يعطيني ذيك الابتسامة الخبييييييييثة

يعني ؟؟ـ

يعني خلاص سقطنااااااااااااااا .. والله من ابتسامته عرفت انه ناوي على شررر !!ـ

والله عبالي عندك سالفة .. قلعتك انت جليل حيا .. مدرس كبر يدك انت تروح تسلم عليه مو العكس !!ـ

.

.

.

قبل الامتحان بيومين

زميل آخر يتصل تلفون

ها شرايك ندرس مع بعض اليوم

” عاد امس مدرسه والحين قاعد ادرس مادة ثانية مالي خلق “

لا قاعد ادرس مادة غيرها

اقولك حصلت تهريب امتحان فاينل قدييييم شرايك نحله مع بعض

” سبحان الله مادري ليش فجأة تغير رايي”

اي مو مشكلة باجر اي وقت يعجبك ندرس ان شاء الله

.

يانا ابو الشباب وهو يتحلطم وواصل حده

خير عسى ماشر ؟!ـ

رحت لسوامي امس المكتب وياليتني مارحت له

شنو نفسيته خااايسة

شنو مايعطي ويييه

يعني خلاص ساقطين ساقطيييين !!ـ

.

.

قبل الامتحان بنص ساعة

توني نازل من المترو بصعد الدري للجامعة

كنت بصعد الدري الي عاليسار بس سبحان الله مثل المغناطيس سحبني الى اليمين

شيبة منتهي تقول متسبح بلبن من كثر ماشعره ابيض

قلت بمشي وراه وشوف وين اخرتها

انا العادة دريتين دريتين والحبيب على هونه يقولك يا الله حسن الخاتمة

اهو اول مالف وراه وبغا يطالعني

قلت له بيب بيييييييييب .. ومدابج بدال لامشي دريتين صرت امشي اربع اربع !!ـ

بس جد لمحته وهو يلف علي شفت بؤس مو طبيعي

بصراحة خفت

اثنين خزهم من قبل ومو مترقعين

هالدور سوامي يعطيني خزه حزت الامتحان .. لا ليحوشك

.

امتحنا والحمدلله غدا شر المادة .. الامتحان كان متوسط والفاينل القديم كان له اثر لاباس فيه يعني بفهم الاسئلة !!ـ

.

.

.

عقبها بيومين كان عندي امتحان مادة برمجة

يعني الدراسة عالكمبيوتر

.

يكون قاص على نفسي مابي انشغل بالبلوق والردود عن الدراسة

بس انا شاك اني جيكت على البلوقات اكثر مما درست :)ـ

حتى قمت ادور على مدونات مازرتها من قبل .. صج فراغة وماكو شغل

.

.

يوم الامتحان

المنبه يرن الساعة 11 ونص الظهر

بعدي ماشبعت نوووم .. سهران لي 5 الفير ادرس .. من متى 6 ساعات نوم تكفيني ؟؟ـ

لكن بما انه الامتحان 7 مساء وانا مو دارس عدل فلازم استغل كل لحظة بالدراسة مو بالنوم

.

ابي اكل لقمة

اطالع طاولة الطعام .. وصخ منثر .. صمون مدور وبعد منتهي من اسبوع !!ـ

الثلاجة فيها حليب لكن ماعندي لا بقصم ولا كورن فليكس ولا حتى كيك

اشوف صحن حمص صارله اسبوعين محمض وخضروات شبه معفنة

الفريزر فيه خبز من سنة يدي تطلعه يفج يطلع لك صخر

اول مرة احس اني عزوبي صج !!!!!ـ

.

.

نزلت بقالة الكوري الي تحت قلت عصير برتقال فرش مع سندويشة وكان الله غفورا رحيما

البرتقال اوكي ماعليه خلاف

بس صمونة بيض بارد مع سلطة وحمص .. الله يعين البطن !!ـ

اول مرة اشوف صمونة تسبب نوبة كحة لمدة ساعتين !!ـ

لكن هذي نتايج حوار الحضارات واختلاط الكوريين بالعرب .. عشنا وشفنا !!ـ

.

.

امتحان بو ثلاث ساعات

ماكان صعب لكن طويييييييييل

الى اخر لحظة وانا اكتب واكتب واسهب واتعمق

خلص الوقت وللحين انا اكتب ليمن خمط مني الورقة وانا ماخلصت !!ـ

عاد عسى يبين بعينه ومايخسف فيني ظلما وجورا كالعادة !!ـ

.

.

رديت البيت

وبما انه باقي اسبوع على الامتحان الجاي قلت اعلن الانقلاب على حياة العزوبية

خميت الشقة وحذفت الاكل المنتهي ورتبت مكتبي

خذيت شاور وبخرت المكان وخليت الاضائة خفيفة على الموود الرومانسي ” احم احم “ـ

وبلشت اشيل اوراق المواد الي خلصتها الى الارشيف

بقى ملف واحد وهو ملف البرمجة .. هالمادة كانت كلاس بو ساعتين ونص مرة بالاسبوع كل اربعا من الثمان ونص لي الحدعش ليلا

زهههههههههق

كل شي فيها يحلى الا الدراسة

انواع الرسم والشخابيط والاشعار والخواطر تطلع بهالملف خصوصا بالايام الاخيرة لما قفلت موليه

قلت هالدرر الفنية حرام تندفن فلازم ادونها قبل لا يروح الملف الى الارشيف

.

.

.

:: خاطرة ::

عندما تشرق الشمس وينتشر الضياء

عندما تغرد البلابل وتصدح الأطيار

عندما يأتي الربيع وتتفتح الأزهار

عندما يموت الهم وتنتحر الأحزان

عندما تصفو النفوس وتغفر الهفوات

عندها يا قلبي حتما سأعود

” يسار الابيات راسم خريطة الكويت بخطي الهيروغليفي “

.

.

.

:: اهداء إلى بروفيسوري الفاضل ::

شرحت أم لم تشرح فالأمر سيان * * * لا علم ينفع والقوم نيام

هبط الليل وصلينا العشاء * * * ومازلت تشرح فمتى تنام ؟؟!ـ

.

.

.

:: اهداء خربوطي للطموح النايم بالكلاس ::

فلاي بالسما عالي * * * لا يهمك بروف بالثرا رابي

هاي للطير الغادي * * * أنا فرند لك يا الغالي

.

.

.

:: اهداء لرفيق دربي الي قالي بالكلاس الصباحي طير .. جليل الحيا ::

قال طر ومالي لا أطير * * * أولست طيرا بلا جناحين أطير ؟؟!ـ

.

.

.

ادري ماكو شغل بس ذكريات نضحك عليها باجر لي تخرجنا :)ـ

.

.

.

بجذي اكون خلصت قرقتي وثرثرتي لهذا اليوم

كنت ناوي اكتب موضوع غير عن مذكراتي ويومياتي لكن اجلت هالموضوع الى وقت قريب

.

.

.

ان كان من كلمة اخيرة فهي مجرد تنويه من البوست السابق تبع زمان الروبوتات

يقولك الي سبو البوت والي تطنزوا عليه والي طيحوا معاه الميانة

كلللللللللكم عليكم واحد

البوت بنفسه رد عالبوست السابق ويقول لكم الي يبي نسخة من المحادثة ترا مسجلها

لا ويمكن يحطها في بلوقه بعد يقول شوفوا هذيله العرب ماعندهم سالفة :)ـ

.

.

المفروض اني خلصت بس كل ساعة قاعد اتذكر شي

فيني نقص هذرة متراكم من الايام الي طافت

لكن حاس انه بطاريتي بدت تخلص

نتنمى انه ماطولنا عليكم وتصبحون على خير

مع انه ادري حزت البوست توكم قاعدين من النوم لكن انا بنام انتوا كيفكم :)ـ

اذكر ايام الثانوي لما كنت بدفعة 99 قالوا وادعوا زورا وبهتانا انه سيكون هناك تشعيب علمي وتشعيب علمي حاسوب

والفرق بينهما ان تشعيب الحاسوب راح يخلون فيه اربع مواد حاسوب بدل الاربع مواد الاختياري الموجود في التشعيب العلمي العادي

طبعا من غير تفكير قررت اتشعب حاسوب وعلى ما يتفرغون ينزلون مواد الحاسوب الجديدة ظليت محتفظ برصيدي من المواد الاختيارية ما اخذت ولا مادة

الى ان بدأت سنة ثالثة وغسلت ايدي انه ينزلون مواد حاسوب قلت يبا حالك حال ربعك اخذ مادة فرنسي يقولون سهلة وترفع المعدل

رحت للمرشد قلت له ابي فرنسي جان يعصب ويحمق وقالي ما اسجلك فرنسي

ليش يبا عسى ماشر !!ـ

انت طالب متفوق ولازم تاخذ مادتين علوم هالكورس وتفتك منهم ..اخذ جيلوجيا واحياء

بس استاذ انا ابي احياء وفرنسي لانه الاحياء كلها حفظ ونفس الشي الجيلوجيا شلون راح اركز

لا لا لا ماعليك مادتين سهلين وحلوين ” معذور لان هو مدرس احياء !!”ـ

وفرنسي انسى ما اعطيك الا لما تخلص هالماديتن !!ـ

سمعت كلام المدرس وطنشت الفرنسي

وبعد عناء مرير مع مواد الحفظ طلعت موادي كلها امتياز ماعدا مادتين

العربي والانجيلزي درجتي فيهم كانت جيد جدا

يعني مو فالح باي لغة !!ـ

وكنتيجة منطقية ..قلت يبا مو ناقص لغة معقدة ثالثة ..خلك على مينونك لا يجيك اين منه !!ـ

بروح ادرس بفرنسا بالغلط …دراسة الفرنسي عبارة عن ترف فكري بحالتي !!ـ

============================

مونتريال مدينة تقع في الجانب الشرقي من كندا في مقاطعة كوبيك الناطقة بالفرنسية

ومما يحكيه التاريخ انه خلال الحروب بين الفرنسيين والبريطانيين للسيطرة على كندا كان الفرنسيين ينتصرون في كل معركة حتى صاروا شبه مسيطرين على الجزء الشمالي من القارة الامريكية الى ان جاءت المعركة الفاصلة والتي كان بامكان الفرنسيين الانتصار بها بكل سهولة لولا ان قائدهم الغبي كان مشغول مع الصاحبة في المعسكر وطنش المعركة وبالتالي قدروا البريطانيين يسيطرون على القارة كلها ويطردون الفرنسيين شر طردة

ولانه الانجليز مليقين ودمهم ثقييييييل ويحبون اذية خلق الله الي مثلي قالوا لازم نخلي هالدولة متعددة الثقافات

احنا ناس مانحب الظلم

في فرنسيين كانوا عايشين في شرق كندا فلازم نخلي لهم اعتبارهم ونعتبر الفرنسي لغة رسمية للدولة بمقاطعة كويبيك التي تقع في شرق كندا

ولانه خلصت مدن كندا كلها فما حولت حضرت جنابي الا الى مدينة مونتريال …العاصمة التجارية لمقاطعة كوبيك وثاني اكبر مدينة في كندا . ـ

كذلك فهي ثاني اكبر مدينة ناطقة بالفرنسية في العالم بعد مدينة باريس …وفيها جامعة مونتريال وهي ثاني اكبر جامعة فرنسية بالعالم بعد جامعة السوربون !!ـ

ومن شدة اعتزازهم بلغتهم يمنع القانون هني اي محل انه يحط لافتة بلغة غير الفرنسي …كلش كلش يكتب بالفرنسي مع ترجمة للغة الاخرى

طبعا في مجال تحصل شغل اذا ماكنت تقدر تتكلم انجليزي لكن مستجيييل تحصل شغل اذا ما كنت تتكلم فرنسي

يارب انا شيابني هالديرررة !!ـ

========================

في الطيارة الي اقلتني من مديتني السابقة فانكوفر الى مونتريال اول ماركبت استقبلنا المضيفين بعبارات

هاي

هلو

ولكم

واحنا نازلين الا يكشفون القناع عن وجوهم الشريرة

ويطلعون جوهرهم الاسود الي كانوا يخفونه طول الرحلة

صاروا يرطنون كلهم من غير استثناء بالفرنسي

ولا كأن هم نفسهم الي قبل شوي يتكلمون انجليزي

لكن لابد ان ياتي يوم يفضح الله فيه المنافقين

وهذا كان هو اليوم الموعود

صار المنافقين يودعون الركاب بكلمة وحدة مايغيرونها

فسوااا

فسوااا

انا هني احتقن الدم بعروقي لكن قلت هين لا اعلمكم

فسوا ياجليليلين الحيا

والله رديت عليها بنفس الكلمة

انا فسوا

انتي فسوا بعد

قلت لامي السالفة قالت لي ياحلو كانت تقولك بونسوا

يعني مساء الخيرررر !!ـ

مساكين ظلمتهم :)ـ

====================

حضرت جنابي واقف بمحطة المترو انطر الدور علشان اشتري تذكرة

كنت ماني متاكد هل هذا هو الدور الصحيح ولا لأ ” بركات الفرنسي “

شوي الا واحد وراي يرطن بالفرنسي وفهمت انه بيسالني عن شغلة

قلت له ماعرف فرنسي ممكن تتكلم انجليزي

يضحك ويأشر لي بثقة انه يابن الحلال هد الحين راح افهمك

سكت جان يبدا يفهمني لكن بالفرنسي !!!!!!ـ

يابابا والله ماتكلم فرنسي

يضحك ويرد يشرح مرة ثانية بالفرنسي

بغيت اذبحه ذاك اليوم بس قلت اي اي كلامك صح شنو اهو مادري بس فكني

====================

المطاعم العربية في مونتريال اكثر من ماكدونلز وساب واي !!ـ

شي خيالي يعني ومع هذا ماكنت مقتنع انه الي يشتغلون فيها عرب

فرحت دخلت ركن المطاعم بالمول واخترت مطعم الباشا ” شي خيالي مع احترامي لمطاعم الكويت يعني ” ـ

شفت وحدة تشتغل قلت اكلمها انجليزي

Can I get chicken donair and beef donair ?

تنحت فعدت عليها السؤال

جان تنادي صاحبها وتقوله

ياخي كلموه هاللزمة مابعرف اتكلم انجيلزاوي

قلت له ممكن شاورما لحم وشاورما دجاج

والله عطتني نظرة حقد مو طبيعية

حسيت اني جليل حيا وقتها :)ـ

=====================

بنفس المول كنت ابي اتريق فشفت مطعم عندهم صمون وحلوم شغل عدل

طلبت وجيت بحاسب الى الاخت ماعندها صرف فنادت صاحبها من محل ثاني وقعدت ترطن معاه فرنسي

بس لقطت منه كلمه وهي اربعين خمسين

يعني اشكره الجماعة مغاربة

عطتني فلوسي فقلت لهم شكرا

طالعت صاحبها جان تستلمه

كام مرة اقولك ماتتلكم عربي ماتتكلم عربي فضحتناا !!ـ

الحمدلله والشكر بس

=====================

قبل جم يوم كان عندنا ضيف فقالي صاحبي ياليت تطبخ لنا عشا

قلت له مرق البرجر الي العادة ناكله انا وياك فيه ثلاث قطع هالمرة نسوي ست كافي

قالي لا تكفى سو 7 لحم و4 دجاج

هي بابا انت عازم اسد ؟؟

قالي لا عازم صعيدي :)ـ

قلت مو مشكل بس اهم شي عطني الماجلة لانه الموارد الي عندي خلصت

وصعدت لي شقة صاحبي وانا لابس دشداشة نوم

اخذت اللحم والدجاج ونزلت بالاصنصير ” وهالكلمة اصلها فرنسي على فكرة !!”ـ

والا وحدة عيوز داخل تطالعني وتضحك وتضحك

وانا طالع جان تقط علي كلمة بالفرنسي الى اليوم وانا شاك انها سبتني

اه يا القهر بس اول مرة يشوفون طباخ عربي ؟!ـ

ضحكت بويها ومشيت …. اقدر اقول شي !!!!!!ـ

واخرتها صاحبنا مسكين اكل مثل ماياكل الطير

خير شالسالفة

ماخبرتش مراتي اني معزوم عاوزني اتفضح اذا ماتعشيت معاها اليوم

ويييييين ايام الصعيدي الي الناس يتراجفون اذا صرخ

معليش راحت ايام الرجولة :P

=======================

طبعا اذا تبي تتعلم فرنسي ومحتاج تقوي الاستماع عندك الشغلة جدا سهلة بمونتريال

ماله داعي دورات ولا بطيخ

وانت رايح الجمعية تبي تحاسب قول حق المحاسب بونجور وماعليك

بيقعد يرطن ويرطن ويرطن بالفرنسي وانت تهز راسك مثل الهندي

بالاخير بيعطيك الفاتورة تدفع الحساب وتقول ميرسي وكان الله غفورا رحيما !!ـ

=======================

ختاما

انا قررت اني اتعلم الفرنسي باي ثمن

طبعا وقت ماعندي وفلوس زايدة ما عندي اذن مافي شي اسمه دورات

بحاول القط القواعد الاساسية للنحو من مواقع النت اذا فضيت

والكلمات كل يوم قاعد اتعلم كلمة جديدة عن طريق الافتات الي بالشراع

تشوف الكلمة وسياقها وتحاول تلقى كلمة لها تشكيل مقارب بالانجليزي فتعرف معناها

جنك قاعد تفك شفرة اللغة الهيروغليفية

وبالاخير كل كلمة جديدة اسجلها بسجلي الخاص علشان ما انساها

وعلشان تطلعون بفايدة من هالمدونة

بنهاية كل بوست راح احط لكم كلمة فرنسية مع معناها الانجليزي والعربي !!ـ

واول ما نبدا نبدا بهذي

بالفرنسي

bienvenue

بالانجليزي

Welcome

بالعرببي

حيا الله من يانا …زارتنا البركة !!ـ

اي نعم

حب من طرف واحد

واذا بتسالون من اي طرف فالإجابة مايبيلها تفكير

مونتريال طبعا هي الي تحبني وتمووووت فيني وبطلتي البهية ..لا يصدق بس !!ـ

ويعني علشان لحد يروح باله بعيد … ترى مونتريال اسم مدينة مو بنية ..يعني نقولها من البداية علشان لا تطلع علينا اشاعات مو ناقصين

قبل سنتين بالصيف الي تخرجت فيه من الثانوي كنت ماخذ دورة توفل بجامعة الكويت لاني كنت متوقع انقبل بخطة البعثات

وفعلا طلع لي قبول في كندا عكس رغبتي الي كانت وقتها امريكا

كلمت واحد من الشباب معاي بالدورة وكان ، ماشاء الله عليه ، خريج مدرسة انجليزية ومعلمينه هناك عن الجامعات بالدول الغربية وهالسوالف

فقالي كنداااااااااااااا !!ـ

هالديرة كلها فرنسي

قلت له قم زين شنو فرنسي انت شايف ويهي ويه فرنسي !!ـ

قال ها لا لا اهي كندا كبيررررة لكن شرقها بولاية كوبيك ” مونتريال هي اكبر مدن هذا الاقليم ” هناك الي يتكلمون فرنسي

فانت دير بااااالك من هالمنطقة لا تروح هناك وتتوهق

قلت له لا توصي حريص

وفعلا الله كتب لي اروح فانكوفر الي تقع في اقصى غرب كندا ..يعني ابعد نقطة عن مونتريال وعن الفرنسيين

مع انه سبحان الله اول مدينة طبيتها بكندا كانت مونتريال لكن هيهااات اقعد فيها ..العلاقة متوترة من البداية… كانت مجرد ترانزيت لساعة خذينا فيها الباص على طول الى العاصمة الكندية اوتاوا لحضور لقاء تنويري بالسفارة

ارتحت لمدينة فانكوفر وللوضع لكن شاء الله انه جامعتهم يعقدونني بامتحان كتابة انجليزي ماتنجح فيه الا اذا كان ابوك شكسبير !!ـ

بدأت رحلة البحث عن جامعة اخرى مبكرا

كانت الخيارات كثييرة في مختلف المدن الكندية

فكنت ابحث وابحث مع وجود خط احمر عند الشرق علشان ما اصل الى مونتريال بلد الفرنجة

مونتريال فيها جامعتين يدرسون بالانجليزي وثلاث بالفرنسي

اما الانجليزيات فوحدة منهم مك جيل وهذي من افضل الجامعات الكندية سمعة والقبول فيها جدا صعب

يعني خارج الحسبة

والاخرى كونكورديا سمعتها بين الجامعات عادية حييل

والي كنا نسمعه عنها انك تقعد قبل الامتحان تشيش بقهوة لبنانية وثاني يوم انت ناجح وبتفوق بعد

علشان جذي شنيت حملة تحذير لكل الشباب الي بيحولون انهم مايروحون هناك مهما كنات الاسباب

يعني كنت ما اواطن شي اسمه مونتريال

وتدور الايام

والمكتب الثقافي يماطلون بعملية ايجاد جامعة بديلة على امل اني انجح بالامتحان

الصيف قرب وللحين مافي جامعة ولا نجاح بامتحان اللغة

الوضع صار صعب خصوصا انه اغلب الجامعات سكروا باب القبول وحضرت جناب المكتب ماقدموا لي على شي ” ليتني سمعت نصايح الي نصحوا وقدمت بنفسي “ـ

من بين هالاحداث تطرأ عطلة اسبوعين بعد نهاية السنة وقبل بداية الفصل الصيفي فقررنا نسوي فيها رحلة في مدن كندا الكبرى

والشباب يحنون خل نروح مونتريااال يقولون حلوة وانا معارض

مافيها شي بااايخة

لكن بالاخير رضخت لهم وخصصت لها يوم واحد بس ” من غير نوم حتى …الصبح تروحون وتردون بالليل للعاصمة اوتاوا !!”ـ

ورحنا مونتريال

اليوم كان ماطر وكئيب

ابو الشباب الي كان المفروض يستقبلنا كان نايم فتوهقنا عدل بمحطة القطارات

الافتات كلهاااااااااااااا بالفرنسي

لاول وهلة يخيل لك ان الناس تتكلم الفرنسي فقط ولا شيء سوى الفرنسي

ضعنا محنا عارفين نسوي شي

بعد نص ساعة فهمنا شلون المترو يشتغل فتوكلنا على الله وركبنا الى وجهة غير معلومة

شوي ولا يوقف صوب جامعة مك جيل قلنا خل نتطمش

نزلنا شفنا واحد شكله هيبة سالناه تدري وين مك جيل

قال يبا جدامكم انت طلبة يدد ؟؟

قلنا لا بس يمكن نحول

والله ويطلع دكتور بالجامعة وياخذنا لي هناك ويسوي لنا جولة بالجامعة

شي فضييع ..ثاني احسن جامعة شفتها بعد جامعة فانكوفر

دخلنا مكتب الطلبة الدوليين والله طاروا فينا .. وزعوا علينا اوراق بالهبل ..جنهم يقولون تكفون حولوا عندنا

قالت لنا باقي يومين على مانسكر باب القبول قدموا الحيييين ونقبلكم

للاسف ماطلت واعتمدت على المكتب وراحت علي هالفرصة الحلوة

وصل دليلنا السياحي العجيب

ورانا جامعة كونكورديا من بعيد

طاحت من عيني …عمارتين بالداون تاون وكان الله غفورا رحيما

تمشينا شوي الا العالم بيحكي لبنايني

والله جنك قاعد ببيروت مو كندا من كثر اللبنانيين ومحلاتهم ومطاعمهم

بس طبعا اذا دشيت المطعم شي اكيييد تلقى المنيو بالفرنسي

لكن لا تخاف ..دام انت بمونتريال فانت تحتاج الى لغة من اثنيتن ..اما الفرنسية او العربية فقط لا غير !!ـ

بس لا تشوفون الفساد

الشارع الرئيسي هناك ” ساينت كاثرين ” اخلع شارع مر علي بحياتي

بين كل دسكو ودسكو دسكو !!ـ

الفرنسيين صايعين بشكل مو طبيعي !!ـ

من هالمشاهدات زاد كرهي لمونتريال اكثر واكثر

وتطوف الايام ويتأكد بشكل رسمي اني لازم اغادر فانكوفر وإلى الآن ماحصلت وجهة

كلمت المكتب قلت لهم ابي جامعة مك ماستر ..قالوا لي ربعي هنك حاااسب تحول عندنا ترى يأخرونك سنة عالفاضي

قلت لهم اوتاوا بس هم لازم خيار ثاني احتياط

وواحد من الشباب نفس حالتي الله فرج عليه وطلع له قبول في كونكورديا يحن على راسي ..مونتريااااال

وبما انه كونكورديا ضمن الجامعات القليلة الي تقبل طلبة جدد في فترة من العام وافقت على مضض اني اقدم عليها كخيار ثاني

وتدور الايام واشحن اغراضي الى الشرق ..الى اوتاوا رغم انه ماعندي قبول هناك

كان الوضع جدا عصيب ذيك الايام والي قرا اخر بوست قبل سفرتي يحس شلون كنت متدوده

سافرت مع اهلي و طلعت نتايج الصيف الي تسود الويه

وحدة ساقط والثانية ناجح عالحفة

لييييييش

بركات التوتر والشحن ايام الفاينلز !!ـ

وتتصل الملحقة الثقافية بنفسها تقولي حاولنا بكل الطرق نقبلك باوتاوا ورغم انه واسطتنا قوية هناك ماقدرنا نقبلك

شلون بس قلتوا لي القبول مضمون 100% ـ

اي قلنا لك جذي بس مادرينا انك بتسقط

وشلون كونكورديا

قالت مادري بس ماتوقع كلش يقبلونك

رد اغراضك مرة ثانية فانكوفر وضبط امورك هناك

انا هني انهرت خلاص ما اقدر اتحمل

طلعت خمالهم كله وطلعت الي بقلبي على الموضفين الي ضيعوني وقلت لها راح اظل على امل اني انقبل وفانكوفر هذا اخر خيار ممكن اسويه

وقعدت عشر ايام احترق بمكاني

مابيدي شي غير اني ادعي وادعي لعل وعسى يطلع لي قبول باي جامعة

ويدق علي ذاك اليوم الموضف يبشرني انه اوتاوا قبلتني

استانست حددددي

ثاني يوم تدق علي الملحقة تقول لا تستانس وايد ماقبلوا الا نص موادك والوزارة ماراح ترضى

رد فانكوفر مثل ماقلتلك

حسبي الله ونعم الوكيل

جيكت المواد الي ماقبلوها الا فعلا فيها اختلاف مو هين عن مواد اوتاوا فمستحيل يقبلون اكثر من الي قبلوه

بس كونكورديا الي بمونتريال في تشابه كثير بين موادها ومواد فانكوفر فصرت ادعي وادعي لعل وعسى يقبلوني

والحمدلله قبلوني عقب جم يوم قبل لا تبدا الدراسة بثلاث اسابيع لكن قبلوا لي مواد اقل من الي قبلوهم اوتاوا

” هني ببجي انا “

بعد مشورة الشباب الي حولوا هناك قالوا لي في امل كبير انك لما توصل هناك تكلمهم ويقبلون لك مواد اكثر

فتمسكت بهالامل الاخير ورحت كونكورديا

” طبعا شلون طلعت من ميامي الى مونتريال بعد اعصار كاترينا هذي يبيلها بوست بروحها !!”

يعني خلال هالمعمعة كنت اتخذ قرارات مصيرية بلمح البصر لانه الوقت صار صج من ذهب

ركضة ركضة ركضة ابي جامعة ابي شقة ابي اي شي يخلني استقر

بعد ماكنت اسهر الليالي اجيك على الجامعات ايهي الزينة وايهي الشينة الحين راضي حتى لو بجامعة الصومال ” اذا كان عندهم جامعة “!!ـ

وبعد لويه الشقة والاثاث والذل الي انذليته علشان يقبلون موادي قعدت مع نفسي واشوف شلون الدنيا دارت فيني

انا الحين في المدينة الي حذرني منها صاحبي قبل لا اسافر

وفي الجامعة الي كنت احذر منها بشدة كل الشباب الي يبون يحولون

في المكان الذي اغلب اهله يتكلمون الفرنسي الي ماافقه منه شي

ومع هذا كله فانا سعيد وفرحان ومرتاح لانه الخيرة هي فيما اختاره الله

ولو اسوي المستحيل

اذا الله كاتب لي اعيش فترة من حياتي في مونتريال فراح اعيش فيها مهما بذلت من الاسباب الي تبعدني عنها

وبعد ما استقريت طبعا اكتشفت اني ظلمت مونتريال وظلمت كونكورديا من غير لا اجرب فيبدوا انه الله سبحانه وتعالى شاء وجودي هني علشان ما اتسبب في ابعاد طلبة اكثر من الي كرهتهم في هالمدينة الحلوة !!ـ

=======================

يمكن البوست فيه تفاصيل زيادة عن اللزوم لكن شسوي

المدونة للفضفضة فخلنا نفضفض شوي

واتمنى الي تعب وقرا البوست كامل انه يستفيد من تجربتي

وترقبوا البوست القادم بعنوان

” التحفة المونتريالية … في فضائح الطموح الفرنسية “

تابع

Get every new post delivered to your Inbox.